Ayoko Na

Hirap. Ang hirap tumanda.

Hirap. Ang hirap dumating sa panahon

Panahong tapos ka na

Tapos ka na sa panibagong kabanata

Kabanata. Kabanatang nagtatrabaho ka na

Kabanata. Kabanatang tapos ka na mag-aral

Pag-aaral na dati’y gusto mong malagpasan

Nang malagpasan ay gustong balikan

Balikan. Balikan natin ang oras na kaunti lang

Kaunti. Kaunti pa lang ang responsibilidad

Responsibilidad na pumasok sa paaralan

Paaralang araw-araw ay pupuntahan

Puntahan. Puntahan na natin ang katotohanan

Katotohanan. Katotohanang may mga dapat ka ng bayaran

Bayaran. Bayaran na walang humpay at di nauubos

Di nauubos dahil tuwing katapusan ay kailangan paghirapan

Paghirapan. Paghirapan ang bawat sentimo at piso

Piso. Piso na higit pa sa ginto ang halaga

Halagang mayroon nga ba?

Mayroon pa bang pangarap?

Pangarap. Pangarap na tila naglaho na

Naglaho. Naglaho sa realidad na kailangan kumita

Kumita muna ng pera dahil ito ang buhay

Buhay na kinakaharap na natin ngayon

Ngayon. Ngayong puro trabaho na lang

Trabaho. Trabaho para mabuhay

Mabuhay para makakain

Makakain para magpatuloy sa buhay na ito

Buhay. Buhay pa ba ang tawag dito?

Dito. Dito na sa kasalukuyan

Kasalukuyang ayoko nang manatili

Dahil pagnanatili ay hindi na uusad

Usad. Usad na sa panibagong pahina

Pahina. Pahina ng buhay na dapat ay mas masaya

Masayang nabubuhay na may layunin

Layuning dapat gawin

Gawin. Gawin na nating kakaiba

Kakaiba. Kakaibang buhay para sa ating sarili

Sarili na nag-iisa at karapatdapat pahalagahan

Makabuluhan at may kasaysayan